Autoriteti i Konkurrencës do të vlerësojë kushtet e tregut për të parë nëse ka shenja të ndonjë marrëveshjeje të ndaluar (kartel) apo abuzim me pozitën dominuese, e cila mund të sjellë pengimin, kufizimin apo shtrembërimin e konkurrencës nëpërmjet vendosjes në mënyrë të drejtpërdrejtë apo të tërthortë të çmimit të blerjes apo të shitjes, ose të ndonjë kushti tjetër tregtimi, i cili ndikon në mënyrë të drejtpërdrejtë tek konsumatori, raporton Gazeta shqiptare.
Tregu përkatës nën monitorim do të jetë tregu i importit dhe tregtimit me shumicë dhe pakicë të gazit të lëngshëm për konsum familjar dhe për bizneset, të cilat e përdorin si lëndë djegëse në ofrimin e prodhimit dhe shërbimeve të tyre kundrejt konsumatorit.
Pas monitorimit dhe vlerësimit të situatës, nëse ka shenja të kufizimit të konkurrencës, Autoriteti do të procedojë menjëherë me marrjen e masave konkrete ndaj subjekteve të tregtimit me shumicë ose pakicë për kthimin e tregut në kushtet e konkurrencës.
