Ndoshta, për ta kuptuar drejt këtë ndjenjë të sotshme të tij për qytetin tonë, duhet kërkuar ndihmën e karikaturistit ferizajas, Imri Musliu.
Besoj, më së miri ai mund ta paraqes tablon e vizitës së sotme të Kadaresë në Ferizaj.
Unë po i ndihmoj vetëm pak…
Salla e Kuvendit të komunës e gatshmë dhe e mbushur me politikanë, sheshi afër teatrit, larg nga salla e kuvendit, i përgatitur për emrin e ri.
Kryetari i komunës flet për historinë e qytetit…
Kryesuesi e quan kolos të letrave shqipe…….
Ndërkohë:
Poeti i njohur ferizajas Faruk Tasholli, në kohën e ardhjes së poetit mbarkombëtar, postoi fotografi nga Janjeva me një poet tjetër. Dy orë më herët e kishte përshëndetur zonjën Helena duke i shprehur asaj mirëseardhje në qytetin e tij të dashur, në Ferizaj.
Poeti tjetër, Besim Zymberi, vlersimin kritik për veprën dhe mënyrën e trajtimit të letrës nga ana e Kadaresë, e jep gjatë ditës në TV Tema. Madje, ai me shikuesit e ndan një përvojë personale shumë interesante gjatë kohës sa ishte në burg.
Regjisori me përmasa kombëtare, ferizajasi Besim Ugzmajli, e fotografon nga larg shkrimtarin e dashur duke mos pasur mundësi t’i afrohej atij për të bërë së paku një selfi.
Drejtoresha e Bibliotekës së qytetit, Teuta Demiri, poston me dashuri foton e autorit të shumë librave që ajo i ka në bibliotekë. E poston foton e bërë në sallën e Kuvendit të Komunës.
Shkrimtari e publicisti Bardh Frangu në shkrimin e tij për Kadarenë, të botuar në “ Zëri” e krahasoi atë me Gjergj Kastriotin, Shën Terezën e me Rugovën. Nuk e përmendi fare pritjen që do i bënte Ferizaj këtij njeriu, që sipas tij, i ka tejkaluar përmasat e atdheut.
Po, megjithatë një artiste e re kishte arritur që në një restaurant të qytetit ta takonte poetin, veprat e të cilit i kishte lexuar nga dy a tri herë.
Emra të tjerë të kulturës e të artit, të heshtur…
Sot, askund, nuk u lexua asnjë varg i shkruar nga ai…
Nuk besoj që Ismajl Kadare gaboi kur e quajti Ferizajn qytet i vogël.
Sigurisht se të vegjël dalim kur poetin e trajtojmë politikisht.
Ai, sot, të vogël e pa Ferizajn.
Fatkeqsisht!
Kjo tablo veç me karikaturë mund të paraqitet drejt.
Lulzim Aliu
