Ferizaj.25.10.2015. Në 18 vjetorin e rënies, Ferizaj sot ka përkujtuar tre dëshmorët e kombit, Naim Bekën, Agim Matoshin dhe Avni Shehun, që të tre ish-pjesëtarë të Ushtrisë Çlirimtare të Kosovës, të cilët u vranë pas çlirimit të vendit duke i kontribuar çështjes kombëtare. Në këtë përvjetor, familjarë, struktura udhëheqëse të vendit dhe qytetarë, kanë bërë homazhe tek Varrezat e Dëshmorëve në Ferizaj, në shenjë nderimi për kontributin e dhënë për çlirimin e vendit.
Nëna e dëshmorit Naim Beka, Hanife Beka, tha se përkundër dhembjes së madhe për djalin që e humbi në lule të rinisë, ndjehet krenare që falë gjakut të tij, Kosova sot frymon e lirë.
“Çka të bëjmë inshallah siç është më mirë bëhet për këta fëmijë, mua nuk më ka tregu asgjë, unë kam qenë jashtë vendit, kam qenë në Gjermani nuk më ka tregu hiç, tani mora vesh që e kanë dënuar, por çfarë të bëj ai ka qenë i vendosur për liri, por jam krenare për djalin tim”,tha Hanife Beka.
Zëvendëskomandanti i Zonës Operative të Nerodimes, Imri Ilazi, tha se përkushtimi i këtyre dëshmorëve në çlirimin e vendit ka qenë shembull për luftëtarët e tjerë.
“Sot kemi ardhë t’i respektojmë, të përkulemi para tyre për heroizmin e tyre dhënë për çlirimin e Kosovës, kemi shumë momente gjatë luftës sepse Naim Bekën dhe Agim Matoshin i kam pasur nën krahë gjatë luftës dhe një moment interesant në pranverën e vitit 98, me Naimin kur kemi kaluar bjeshkët e Sharrit me pesha të mëdha ku u ndalëm në një moment të pushojmë dhe në atë moment na kishte zënë gjumi në këmbë të dyve, do të thoja ka qenë një moment kur nuk ndalesh për të realizuar synimet dhe lirinë e popullit tonë”,tha Ilazi.
Naim Beka, Agim Matoshi dhe Avni Shehu, u vranë më 25 tetor të vitit 1999. Beka dhe Matoshi, prehen në paqe në Kompleksin e Varrezave të Dëshmorëve në Ferizaj, ndërsa Shehu në Kompleksin e Varrezave të Dëshmorëve në Kaçanik, transmeton Televizioni Tema.
