Duke i pritur vendimet e qendrës, dega e PDK-së në Ferizaj, listën me emra të kandidatëve për deputetë e mbanë ende veç për vete. Ky subjekt politik pretendon të garoj me 4 kandidatë nga Ferizaj, por kjo varet se sa do të ngushtohet rrethi kur do të vendos Kadri Veseli.
Faktin që me krijimin e koalicionit parazgjedhor me AAK-në dhe Nismën, do të reduktohet edhe lista e kandidatëve për deputetë, e pranon edhe Nehat Mustafa i PDK-së, por ai shpreson që rajoni i Ferizajt edhe në këto zgjedhje do të përfaqësohet kënaqshëm.
“Ne kemi qenë të sigurtë që po të kishte hyrë PDK-ja e vetme në këto zgjedhje me siguri që numri i kandidatëve nga komuna e Ferizajt do të ishte prej 6 deri në 8, por tani jemi në pritje të një analize që do ta bëjë kryesia qendrore, por besoj që ndoshta PDK-ja e Ferizajt do të përfaqësohet me katër kanidatë, si dhe jam i sigurt se të gjithë kanidatët që do të propozohen nga PDK-ja do të fitojnë dhe do të jenë në mesin e 10 të parëve”, tha Mustafa.
PDK-ja e Ferizajt njoftoi se tashmë i kanë nisur kontaktet me AAK-në e kësaj komune. Pavarësisht që këto dy parti do të funksionojnë me shtabe të ndara, Nehat Mustafa thotë se nëpër tubime elektorale do të paraqiten bashkë.
“Ne si parti e kemi formuar shtabin zgjedhor dhe pavarësisht prej zhvillimeve me partitë tjera shtabi ynë do të funksionojë në vete, por që në momente të caktuara do të bashkohemi me shtabin e AAK-së, ku do të marrim pjesë nëpër tubime elektorale. Kontaktet për bashkëpunim tashmë i kemi filluar dhe po presim që KQZ-ja të dalë saktë me numrin e vëzhguesve dhe mënyrën se si do të funksionojmë në këtë fushatë zgjedhore”, tha Mustafa.
Sipas burimeve brenda PDK-së, në listën e cila do të dërgohet në Prishtinë nga Ferizaj figuron emri i Bajrush Xhemajlit, Elmi Reçicës, Agim Aliut, Mexhide Topallit si dhe Imri Ilazit, transmeton Televizioni Tema.
