Gjykata Themelore në Ferizaj përmes një komunikate për media ka bërë të ditur se ka caktuar masën e paraburgimit prej 1 muji për të pandehurin Z.Z shtetas i Republikës së Kosovës pasi që i njëjti dyshohet se ka kryer veprën penale të “dhunimit”.
Siç thekson komunikata e Gjykatës, ekziston dyshimi i bazuar mirë që i pandehuri nga muaji mars 2019 deri në korrik të vitit 2022 në vazhdimësi e ka keqpërdorur seksualisht të dëmtuarën duke qenë në dijeni se e njëjta është nën moshën 16 vjeç.
Z.Z dyshohet se me përdorimin e forcës dhe pa pëlqimin e saj ka kryer akt seksual.
Komunikata e plotë:
Paraburgim ndaj Z.Z., i dyshuar për veprën penale dhunimi
Ferizaj, 16 shtator 2022 – Gjykata Themelore në Ferizaj, ka aprovuar kërkesën e Prokurorisë Themelore të Ferizajt, për caktimin e masës së paraburgimit kundër të pandehurit Z.Z. shtetas i Republikës së Kosovës, për shkak të dyshimit të bazuar se ka kryer veprën penale dhunimi nga neni 227 paragrafi 6 lidhur me paragrafin 1 lidhur me nenin 77 të Kodit Penal të Republikës së Kosovës (KPRK).
Pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake, ka vlerësuar se ekziston dyshimi i bazuar mirë, se i pandehuri në muajin mars 2019, e në vazhdimësi deri në muajin korrik 2022, në kohë të pacaktuar në Ferizaj, ka keqpërdorur seksualisht të dëmtuarën – e mitur, duke e ditur se e dëmtuara është nën moshën gjashtëmbëdhjetë (16) vjeçare, me përdorim të forcës dhe pa pëlqimin e saj ka kryer akt seksual.
Gjyqtari i procedurës paraprake, kërkesën e prokurorit të shtetit për caktimin e masës së paraburgimit kundër të pandehurit e ka aprovuar si të bazuar konform dispozitave të KPPRK-së, dhe të njëjtit i është caktuar masa e paraburgimit në kohëzgjatje prej një (1) muaj.
Me këtë rast palët njoftohen se ankesa kundër këtij aktvendimi nuk e shtynë ekzekutimin e tij.
