Në 24-orëshin e fundit janë shënuar 1,084 raste të reja me COVID-19 në Kosovë, ndërsa një person ka vdekur si pasojë e koronavirusit.
Në njoftimin e Ministrisë së Shëndetësisë bëhet e ditur se sot janë shëruar 406 qytetarë.
Në total numri i rasteve aktive është 4 mijë e 902.
Sipas njoftimit, në 24-orët e fundit janë dhënë 293 doza të vaksinës kundër COVID-19.
Instituti Kombëtar i Shëndetësisë Publike të Kosovës, ka apeluar tek qytetarët që të bartin maskat dhe të vaksinohen, pasi që, siç thuhet IKSHPK-ja, pandemia Covid-19 nuk ka mbaruar.
IKSHPK, në njoftimin e saj shton se bashkë me MSH rekomandojnë qytetarët që të jenë të kujdesshëm në zbatimin e masave preventive kundër sëmundjeve ngjitëse dhe të vaksininohen kundër COVID-19
Njoftimi i plotë:
Të nderuar qytetarë!
Ju lutemi bartni maskat në ambiente të mbyllura dhe vaksinohuni!
Kosova po vazhdon të shënojë shtim të rasteve të reja të COVID-19 me tendencë të rritjes ditët në vijim.
Fatkeqësisht sot është raportuar një rast i vdekjes nga kjo sëmundje!
Në vende të ndryshme të botës, po regjistrohen raste të shumta të COVID-19, sepse pandemia COVID-19 nuk ka mbaruar.
IKSHPK është duke vazhduar pandërprerë me testimin dhe gjurmimin e të gjitha rasteve, kontakteve të rasteve në komunitet dhe diagnostikimin laboratorik andaj të gjithë personat me kokëdhembje, kollitje, dhembje fyti, vështërsi në frymëmarrje, rrjedhje hundësh, temperaturë, plogështi, humbje e shijes, rekomandohen të testohen.
Me qëllim të përforcimit të imunitetit dhe parandalimit të rasteve të reja dhe formave të rënda të sëmundjes, qytetarët këshillohen që vaksinohen, me dozën e parë të dytë dhe të tretë mund të vaksinohen të gjithë personat e moshës mbi 12 vjeç;
me dozën e katërt, mund të vaksinohen personath e moshës mbi 60 vjeç, me kusht që të kenë kaluar katër muaj nga marrja e dozës së tretë.
MSh dhe IKSHPK rekomandojnë qytetarët që përkundër situatës së qetë dhe stabile epidemiologjike në vend, të jenë të kujdesshëm në zbatimin e masave preventive kundër sëmundjeve ngjitëse dhe të vaksininohen kundër COVID-19.
