Një rruge të zakonshme prapa stacionit të autobusëve në Ferizaj i është shtuar një mini-bibliotekë e veçantë, raporton KTV.
Dy vëllezërit Tefik e Mensur Islami, bashkë me disa shokë, kanë ndërtuar këtë librari të vogël, që është bërë atraksion në këtë qytet. Tefiku, i cili ka përfunduar studimet në Mjekësi të Përgjithshme në Universitetin e Peruxhas në Itali, thotë se u frymëzua nga ajo që ka parë në vendet evropiane.
Ndërsa shtysë ishte edhe mungesa e një librarie në Ferizaj.
“Kemi dashur t’i ofrojmë mundësi lagjes dhe nxënësve që kalojnë këndejpari, me iu ofru mundësinë me pasë qasje në të dhe me shpërnda kulturën e leximit që na mungon.”Librat nga ky dollap, sipas 28-vjeçarit, do të jenë në funksion të atyre që e duan leximin. Lexuesit mund të marrin falas ose të sjellin librat e tyre – madje edhe lënë ndonjë mesazh në to.
E quajtura “Libraria e vogël falas” po pëlqehet shumë nga ferizajasit, veçmas nxënësit që këtë rrugë e shfrytëzojnë për të shkuar në shkollë.
Madje, një institut për edukim në këtë qytet po mendon zgjerimin e idesë së vëllezërve Islami. Kjo mini-librari, që nisi funksionimin para pak ditësh, ka fituar edhe zemrat e shumicës së shoferëve, të cilët edhe kur i parkojnë veturat lënë hapësirë para saj.
