Drejtoria e Shërbimeve Publike në Ferizaj, njofton qytetarët se me datën 21.06.2023 duke filluar nga ora 22:00 e deri më datën 22.06.2023 në ora 20:00 do të bëhet mbyllja e përkohshme e një segmenti (pjese) të rrugës urbane “Driton Islami” te kryqëzimi me rreth-rrotullim me rrugën urbane “Brahim Ademi”, konkretisht segmenti rrugor që kalon mbi binar hekurudhor të qytetit të Ferizajt.
Mbyllja bëhet për shkak të punimeve që do të zhvillohen në rehabilitimin e pjesës Jugore të linjës hekurudhore 10 (Fushë Kosovë – Hani i Elezit), ku në kuadër të këtyre punëve do të bëhet edhe asfaltimi i rrugës urbane “Driton Islami” (pjesa e dëmtuar).
Rrugë alternative për qarkullimin e automjeteve në trafik me datat dhe kohën e lartshënuar, mund të përdoren rrugët “Sali Çeku”, “Ismet Sopa” dhe rruga “Bedri Asllani” – rruga për rreth objektit të Stacionit Policor në Ferizaj si dhe rruga urbane “Ahmet Kaçiku”.
Apelojmë te qytetarët që të shfrytëzojnë rrugët alternative dhe të kenë mirëkuptim, deri në përfundimin e punëve, ndërsa nga Policia e Ferizajt kërkojmë që me një intensitet më të shtuar të policëve të kryejnë mbarëvajtjen dhe sigurinë në trafik, thuhet në njoftimin e Drejtorisë së Shërbimeve Publike në Ferizaj.
Paraprakisht ju falënderojmë për bashkëpunim !
