Të enjten është bërë asfaltim i rrugëve “Ilmi Hashani” dhe “Feniksi” në fshatin Greme. Nga afër punimet në realizmin e këtij projekti i përcollën kryetari i Muharrem Svarqa dhe drejtori i infrastrukturës, Gafurr Ilazi.
Mbikëqyrësja e këtij projekti inxhinierja Leonora Zeqiri, tha se kjo rrugë ka një rëndësi shumë të madhe për banorët sepse dukshëm lehtëson qarkullimin e banorëve të kësaj pjesë të fshatit Greme.
“Kjo rrugë po asfaltohet me standarde të larta, me gjashtë metra gjerësi, 11 cm trashësi dhe me ngjeshje adekuate”, ka thënë Zeqiri.
Edhe banorët e kësaj rrugë janë shprehur shumë mirënjohës Komunës së Ferizajt, për asfaltimin e rrugës së tyre. Ata thanë se tashmë janë krijuar lehtësira shumë të mëdha të qarkullimit.
Rrugët “Ilmi Hashani” dhe “Feniksi” kanë një gjatësi mbi 1200 metra dhe ka dy shtresa të asfaltimit. Vlera e këtij projekti kap shumën mbi 85 mijë euro.
