Ferizaj, 20 korrik 2025 – Me një atmosferë festive dhe pjesëmarrje të gjerë të qytetarëve dhe mërgimtarëve, sot në sheshin “Adem Jashari” në Ferizaj nisi manifestimi tradicional “Ditët e Mërgatës”, i cili do të zgjasë nga data 20 korrik deri më 13 gusht.
Aktiviteti hapës, i dedikuar fëmijëve dhe organizuar nga Ansambli “Kastriotët” (grupi i fëmijëve), shënoi nisjen zyrtare të këtij manifestimi, përmes një programi artistik me valle dhe performanca që pasqyruan trashëgiminë kulturore shqiptare.
Nën përkujdesjen e kryetarit të Komunës së Ferizajt, z. Agim Aliu, manifestimi do të sjellë për qytetarët dhe mërgimtarët një kalendar të pasur aktivitetesh që përfshijnë: promovime librash, panaire artizanale, turnire sportive, ekspozita artistike dhe fotografike, koncerte, si dhe vizita turistike me pjesëmarrjen e grupeve nga diaspora.
Aktivitetet kryesore përfshijnë:
21 korrik – Promovimi i librit “Qamili i vogël, këngëtar i madh”, me autorë Sylejman Salihu dhe Salih Berisha, në Galerinë e Arteve.
22 – 25 korrik – “Panairi i Bizneseve Artizanale”.
Turne sportive – Ndeshje të futbollit të vogël në fshatrat Prelez dhe Pleshinë.
Aktivitete në natyrë – “Hiking – Ecje malore” (në bashkëpunim me sektorin e sportit dhe shoqatat bjeshkatare) dhe “Lojëra elementare në ujë” (Sektori i Sportit / KN “Kastrioti” / Pishina Matoshi).
Festivali Ndërkombëtar i Valleve “N’Karadak krisin tupanat” – Me pjesëmarrjen e grupeve folklorike nga vende të ndryshme të botës.
“Koloni artistike për mërgimtarët” – Organizuar nga Galeria e Arteve dhe SHAF “Zef Kolombi”.
Aktivitete ekonomike – “Takimet B2B” dhe tryeza diskutimi me biznese nga diaspora, në organizim të Drejtorisë së Ekonomisë dhe Turizmit.
“Panairi i Librit” – ( 05 – 08 gusht ) e organizuar nga Klubi “De Rada” – Ferizaj.
Manifestimi do të kulmojë më 13 gusht, me koncertin përmbyllës të organizuar nga Shoqata “Kapfenberg”, ku do të performojnë artistë mysafirë nga Austria.
“Ditët e Mërgatës” përbëjnë një mundësi të jashtëzakonshme për bashkëpunim, rikthim në rrënjë dhe promovim të kulturës, trashëgimisë dhe rolit të pazëvendësueshëm të diasporës në jetën kulturore dhe zhvillimore të Ferizajt./ Për FerizajPress, Aurorë Zymberi
