Në Sallën e Sportit të Shkollës së Mesme të Bujqësisë në Ferizaj, po vazhdon procesi i vaksinimit kundër COVID 19.
Aktualisht janë duke u vaksinuar qytetarët e grupmoshave mbi 65 vjeç, personat me sëmundje kronike, insulinë-vartësit dhe personat me sëmundje të tjera kronike mbi 18 vjeç, të cilët duhet të kenë me vete raportin e mjekut me diagnozën e sëmundjes.
Nga këto kategori të qytetarëve përparësi kanë ata që janë regjistruar në platformën https://ekosova.rks-gov.net, ndërsa lista ditore plotësohet me të tjerët që regjistrohen te infermieret në sallën e sportit ku po bëhet vaksinimi.
Deri më tani, në Ferizaj, numri i qytetarëve të vaksinuar me dozën e parë të vaksinës Astra zeneca është 3440, ndërsa me Pfizer 1774, pra gjithsejtë 5214 qytetarë janë të vaksinuar.
Gjithashtu, këto ditë do të fillojë edhe vaksinimi i qytetarëve me dozat e dyta të vaksinave, sipas datave që i kanë të caktuara në kartelën e vaksinimit.
Përkundër vaksinimit, qytetarët luten që edhe më tutje t’i respektojnë masat mbrojtëse anti-covid.
