Napoli – Milan, ndeshje e zemrës për shumë emra të njohur

Tragjedia e Gjenovës bëri që ndeshja Milan-Genoa të mos luhet dhe debutimi i kuqezinjve të shtyhet për këtë të shtunë, kur skuadra e Gattusos do të zbresë në “San Paolo”, për t’u përballur me Napolin e Ancelottit.
Natyrisht që shtyrja e takimit të parë nuk i pëlqeu shumë teknikut të Milanit, që tashmë do të duhet të bëjë llogaritë me mungesën e turkut Calhanoglu, i pezulluar që nga viti i kaluar dhe për më tepër, të testosh për herë të parë skuadrën përballë Napolit, nuk është aspak mundësi e mirë.
Gjithsesi, përtej futbollit, sfida do të prodhojë edhe emocione të shumta, pasi janë të paktën 3 personazhet, që vijnë në pozitat e “ish-it” në këtë sfidë, duke filluar nga tekniku Ancelotti, sulmuesi Higuain dhe portieri Pepe Reina.
Hera e fundit që Ancelotti luante kundër Milanit, ishte në vitin 2001 kur drejtonte Juventusin, sepse më pas mori pankinën e kuqezinjve dhe arriti të fitojë shumë trofe, përpara se të niste turin europian, ku drejtoi disa nga skuadrat më të mira të futbollit.
Edhe debutimi i Higuain me Milanin do të jetë mjaft i veçantë, pasi do të ndodhë pikërisht në “San Paolo”, ku sulmuesi argjentinas ka luajtur për 3 sezone, 2013-2016 dhe ka shënuar plot 91 gola në 146 takime. Argjentinasi kaloi mes polemikash te Juventusi dhe tifozët nuk i rezervuan atë trajtimin special që mund të kishte ëndërruar, pasi vetë Higuain vendosi të festojë golin e shënuar ndaj ish skuadrës së tij.
Gjithsesi rikthimi i tij në “San Paolo” është vërtetë diçka impresionuese, pasi aty ka kaluar periudhën më të ndritur të karrierës dhe ka shënuar rekord në sezonin 2015-2016, ku në 35 ndeshje, e dërgoi 36 herë topin në rrjetë.
Një tjetër rikthim në “San paolo” do të jetë edhe ai i portierit Pepe Reina, i cili pas 4 sezonesh në katërkëndëshin e Napolit, vendosi të mos rinovojë kontratën dhe t’i bashkohet Milanit, për të punuar me Genaro Gattuson.
Me shumë gjasa Reina do të niset nga stoli, pasi titullar është ende Gigio Donnarumma, por për spanjollin, pritet që napolitanët të kenë rezervuar një kor mjaft të ngrohtë, pasi portieri ka respektuar gjithmonë tifozërinë e tij dhe ka dhënë maksimumin në fushën e lojës, transmeton “SS”.
Gjithsesi përtej emocioneve, Ancelotti do të kërkojë nga skuadra e tij të njëjtin impenjim si me Lazion, pasi e di mirë se 3 pikët ndaj kuqezinjve do të bënin që të kalohej me sukses testi i fillimit dhe skuadra të fitonte besim për të ardhmen.
Nga ana tjetër, Gattuso do të ishte më i lumtur të debutonte ndaj Genoas, për të parë defektet e skuadrës dhe për t’u korrigjuar ndaj napolitanëve, por fati e do që të zbresë në fushë për herë të parë, pikërisht të shtunën në mbrëmje.
Fitorja do të ishte një ëndërr, por synimi i vërtetë i teknikut kuqezi është që të dalë pa humbje nga “San Paolo”, sepse në këtë mënyrë skuadra do të fitonte besim dhe Gattuso do të mund të punonte i qetë për sfidat në vijim.