Ministria e Mjedisit dhe Planifikimit Hapësinor do të nënshkruajë të mërkurën Memorandumin për Bashkëpunim me Komunën e Ferizajt për bashkëfinancimin e projektit “Funksionalizimi i Bifurkacionit në Lumin Nerodime”.
Rrjedha e bifurkacionit në lumin Nerodime me muaj të tërë është bllokuar nga bizneset private dhe me këtë projekt synohet rikthimi i rrjedhës së lumit te bifurkacioni.
Grupi Koha ka raportuar në vazhdimësi për bllokimin e rrjedhës që lumin e Nerodimës e ndanë në dy dete, atë Egje dhe Detin e Zi, çka e bën këtë fenomenin e dytë të këtij lloji në botë pas atij në Venezuelë të Amerikës Latine.
Shtrati i lumit që në vendin kur ndahet e që përfundon më pas në dy dete mbetet i tharë, derisa zyrtarët e Komunës së Ferizajt, thonë se së shpejti do të bëjnë zgjidhje për problemin. Në këtë vend vijnë vizitorë nga vende të ndryshme të botës, por nuk e gjejnë atë që kanë pritur, raportonte KTV.
Bifurkacioni i lumit Nerodime, tash e një kohë ka mbetur vetëm shtrati i tharë i një lumi që ndahet në dy degë, e që dikur përfundonin në dy dete.
Kjo gjendje, sipas Shaban Kashtanjevës, është krijuar pasi që lumit Nerodime i është penguar rrjedha nga një restorant tjetër afër, e pavarësisht ankesave, zgjidhja nuk është bërë.
