Ferizaj.14.10.2017. Klubi i karatesë “Kastrioti” në Ferizaj, për herë të dytë ka organizuar garën ndërkombëtare të karatesë, ku në të morën pjesë mbi 300 sportistë të rajonit. Kjo garë e cila u zhvillua në ambientet e sallës “Bill Clinton” në Ferizaj, u tha se pretendohet të bëhet tradicionale.
“Kjo garë është në kalendarin e rregullt të federatës, mirëpo ne pretendojmë që do të fusim këtë garë në nivel evropian. Sot marrin pjesë garues nga Kosova, Maqedonia, Mali i Zi dhe Shqipëria. Gara po rrjedh shumë mirë, aktiviteti po ecën ashtu siç e kemi planifikuar dhe mendoj që do të jetë një shembull dhe simbol i mirë për qytetin”, tha Raif Musa nga klubi ‘’Kastrioti’’.
Kryetari i Federatës së Karatesë në Kosovë Ismet Krasniqi, tha se ky sport ka traditë në Ferizaj.
“Ky organizim duket që është shumë i mirë, përkrahjen e federatës e ka çdo klub i Kosovës që dëshiron të organizoj turnire të tilla. Ky është turneu i dytë i këtij lloji që organizohet nga klubi i Ferizajt dhe shpresoj se do të vazhdoj edhe më tutje. Mendoj se çdo garë që ndodhë ne Kosovë është në favor të sportit, të karatesë, sepse këta garues marrin përvojat e tyre në luftat dhe kada”, tha Krasniqi.
Ndërkaq, për trajnerin e kombëtares së Kosovës në karate, kjo garë tregon që Ferizaj dhe ky vend në përgjithësi e donë sportin dhe zhvillimin e tij.
“Çdo turnir që mbahet në Kosovë është pikë pozitive, do të thotë sa më shumë që mbahen aktivitete të mira është në progres për sportistët e këtij sporti. Me këtë tempo çfarë është tani besoj që karateistët e Kosovës do të kenë shumë suksese edhe në arenën ndërkombëtare”, tha Fehmi Mahalla.
Në këtë turnir të quajtur “Kupa e Kastriotit”, kupa morën fituesit e vendeve të para të secilës kategori, ku në të janë përfshirë rreth 80 kategori.
Kjo garë ndërkombëtare e karatesë në Ferizaj, është mbajtur me buxhet vetjak të klubeve dhe prindërve, transmeton Televizioni Tema.
