Ferizaj.03.08.2018. Gjatë ditës së sotme, në ambientet e Kuvendit të Komunës, Kryesuesja e Kuvendit të Komunës, Kristina Gashi – Bytyçi e shoqëruar edhe nga zyrtarë nga Drejtoria e Arsimit dhe Drejtoria e Shëndetësisë dhe Mirëqenies Sociale, mbajtën diskutimin publik të Draft Rregullores Komunale për realizimin e të drejtave të fëmijëve përmes sistemit qeverisës komunal miqësor për fëmijë.
Ky dokument mjaft i rëndësishëm për të drejtat e fëmijëve dhe obligimet e institucionit të Komunës karshi tyre, i propozuar nga ekzekutivi komunal me mbështetjen e plotë edhe nga Kryetari i Komunës, Agim Aliu, u mirëprit nga të pranishmit, prindër, fëmijë dhe përfaqësues të organizatave komunitare që në plan programet e tyre kanë të drejtat e fëmijëve.
Tutje, në këtë diskutim zyrtarët komunal nga Drejtoria e Arsimit dhe Drejtoria e Shëndetësisë dhe Mirëqenies Sociale, elaboruan aspekte të këtij dokumenti duke e quajtur një hap para në plotësimin e kritereve të nevojshme për mbrojtjen dhe promovimin e të drejtave të fëmijëve.
Ndonëse me prezencë domethënëse në këtë diskutim nga ana e fëmijëve, nuk pati sugjerime të shumta përkitazi me këtë dokument. Theks të veçantë njëra nga diskutantet vuri tek të drejtat e fëmijëve me nevoja të veçanta dhe obligimet që ka Komuna për të siguruar infrastrukturën e nevojshme që mundëson qasjen e tyre pa pengesa.
Kryesuesja e Kuvendit të Komunës së Ferizajt, Kristina Gashi – Bytyçi falënderoi të pranishmit për pjesëmarrjen në këtë diskutim, duke siguruar se qeverisja e re e udhëhequr nga Kryetari i Komunës së Ferizajt, Agim Aliu ka vëmendje të shtuar dhe kujdes institucional ndaj të drejtave dhe lirive të fëmijëve dhe si e tillë, do të përgatis një bazë të shëndosh ligjore e infrastrukturore për mbrojtjen dhe promovimin e tyre.
