Iniciativa e 22 dhjetorit me 43 nënshkrime të deputetëve për ta shfuqizuar Gjykatën Speciale, tashmë është në duart e Qeverisë.
Qeveria ka afat që brenda një muaji të paraqesë mendimin e vet me shkrim lidhur me iniciativën.
Deri atëherë, kjo çështje po vazhdon të komentohet.
Është zëvendëskryeministri Fatmir Limaj ai i cili thotë se një shfuqizim i mundshëm i Gjykatës Speciale është i dëmshëm për vendin. Dëmi sipas tij është më i madh se vetë themelimi i kësaj Gjykate.
Lideri i Nismës Social-Demokrate nuk mendon se kjo çështje duhet të vihet në rend dite duke parë më të rëndësishme tema të tjera.
“E kthyem një temë që është e harruar. Ne edhe në vitin 2015 kemi qenë kundër Gjykatës. Ne asnjëherë nuk mundemi me i thanë jo drejtësisë. Ne i kemi thanë po adresimit të krimit, por jo qysh po doni me thanë ju. Ne kemi thanë, ne duan drejtësi e cila vrapon pas provave e jo pas përkatësisë etnike apo emrave të përveçëm. Ata nuk kanë ditë as çka po nënshkruajnë”, ka deklaruar Limaj.
“Ne kemi thanë se sa herë që vjen në parlament, ne e votojmë, e votojmë ndryshimin e asaj gjykate,. Por ne duam që iniciativa të ketë përgjegjës, të ketë adresë. Si ka qenë votimin i gjykatës i dëmshme për Kosovën në 2015’ën, shumë ma shumë është i dëmshëm shfuqizimi i saj në mënyrën qysh ka ndodhë”, ka shtuar ai.
