Kuvendi i Komunës së Ferizajt, këtë të enjte ka mbajtur mbledhjen e trete të këtij viti.
Fillimisht kryesuesi i Kuvendit të Komunës së Ferizajt, Faruk Guri, anëtarët e këtij Kuvendi i ka njoftuar me 17 pika e rendit të ditës që ishin përgatitur për këtë mbledhje.
Fillimisht kryesuesi Guri, ka kërkuar nga anëtaret e kuvendit që të caktohen dy anëtarë nga Kuvendi Komunal për komisionin për ndarjen e bursave për student për vitin akademik 2016-2017, me ç’rast me vota unanime u caktuan Hysnie Mustafa-Shamolli nga Lidhja Demokratike e Kosovës dhe Edona Bakolli nga Partia Demokratike e Kosovës.
Në këtë mbledhje u morë vendim për destinimin e ngastrës kadastrale me numër 498-0 Z.K për varreza të Fshatit të Vjetër.
Por pika më e nxehte e rendit të ditës e cila kishte të bënte me destinimin e ngastrës kadastrale 1348-0 ZK Ferizaj për raste sociale. Në këtë pikë të rendit kanë diskutuar të gjithë anëtarët e Kuvendit të Komunës, që shumica prej tyre ishin kundër këtij vendimi.
Kundër këtij vendimi ishte edhe nënkryetari i Komunës së Ferizajt, Xhavit Zariqi, i cili dha edhe arsyetimet e tij se pse është kundër një vendimi të tillë.
Për mbledhjen e ardhshme të Kuvendit të Komunës u shty pika e rendit të ditës për shpalljen e interesit të përgjithshëm për ngastrën kadastrale 595-0 Z.K. Slivovë e cila parashihej për varrezat e këtij fshati.
Ndërsa u miratua propozim-vendimi për ngastrën kadastrale 76-0 Z.K. në fshatin Tërrn, të cilat do të destinohen për varreza të këtij fshati.
Me vota unanime të të gjithë asamblistëve u morr vendimi për destinimin e një ngastre kadastrale në fshatin Koshare për shtatoren e dëshmorit Besim Fazliu.
Asamblistët po ashtu kanë votuar edhe për propozim – vendimin për destinimin e ngastrave kadastrale 1140-3 dhe 1143-3 Z.K. në Ferizaj për ndërtimin e një shkolle, ndërsa më vota unanime është bërë edhe aprovimi i ofertës sa i përket raportit të komisionit për dhënien e tokave në shfrytëzim për konkursin e datës 14 Nëntor 2016 – Rahovicë.
Me vota unanime është pranuar edhe dorëheqja e Samir Rekës, nga komisioni për dhënien në shfrytëzim të pronave komunale, ndërsa në vend të këtij të fundit është emëruar Kenan Gashi nga rrjeti i organizatave joqeveritare “Avonet”.
Po ashtu u miratua edhe propozim-vendimi për Planin Komunal të Menaxhimit të Mbeturinave 2017 – 2021.
U morr vendim edhe për aprovimin e Rregullores Komunale, për procedurat dhe Kriteret e Vendosjes dhe Mirëmbajtjes së Përmendoreve, Busteve, Monumenteve dhe Pllakave Përkujtimore në Komunën e Ferizajt, për propozimin-vendimin për dislokimin apo zhvendosjen e rrugës në fshatin Mirash si dhe për raportin financiar për vitin 2016.
Po ashtu në këtë mbledhje është diskutuar edhe pika të ndryshme të rendit të ditës.
