Këshilltarët e Kuvendit të Komunës së Ferizajt, këtë të mërkurë janë mbledhur në mbledhjen e radhës për të diskutuar shumë pika të rendit të ditës, por ajo e cila ngjalli më së shumti interesim ishte raporti vjetor i punës së qeverisë komunale për vitin 2016.
Por, fillimisht këshilltarëve komunal i është drejtuar kryesuesi i Kuvendit, Faruk Guri, i cili në mënyrë të detajuar ka prezantuar pikat e rendit të ditës të përgatitura për këtë mbledhje.
Në këtë mbledhje me shumicë votash u mor vendim që tri toka të cilat ishin me destinim bujqësor të kthehen në atë ndërtimor.
Pas këtyre pikave të rendit të ditës, u diskutua gjerë e gjatë edhe për raportin e punës për vitin 2016.
Fillimisht kryetari i komunës së Ferizajt, Muharrem Svarqa, u tha kuvendareve se janë bërë punë mjaft të mira gjatë këtij viti por që janë shoqëruar edhe me vështirësi e sfida . Ai theksoi se kanë mbetur ende punë por që qeverisja e suksesshme nuk mund të mohohet në asnjë mënyrë.
“Dëshiroj të theksoj se gjatë vitit 2016 kemi arritur të realizojmë me sukses planin buxhetor , të kemi të hyrat më të mira që nga paslufta nga tatimi në pronë. E kemi rritur cilësinë e shërbimeve administrative për qytetarët duke treguar efikasitet të lartë në përmbushjen e kërkesave të tyre. Qytetarëve u kemi krijuar hapësira të reja duke hapur objekte të gjendjes civile . Kuvendi i komunës ka miratuar disa rregullore , strategji e plane të veprimit , janë diskutuar me qytetarë e grupe ekspertësh dokumente të rëndësishme urbanistike , janë zgjeruar hapësirat e shërbimeve shëndetësore , ndërkohë që janë vendosur dy ordinanca stomatologjike nëpër shkollat e komunës sonë , afaristëve të interesuar u janë dhënë në shfrytëzim prona komunale për hapjen e bizneseve ose zgjerimin e tyre. Është zgjeruar zgjerimi i rrugëve në gjatësi mbi 10 kilometra , është shënuar përparim në cilësinë e arsimit, dhe numër më i vogël mungesash në shkolla , janë dhënë qindra e mijëra euro për subvencionimin e bujqve të cilët kanë përfituar fidanë pemësh sisteme të ujitjes dhe sidomos mundësi për të marrë kredi në bankat tona pa kamatë të cilën e paguan komuna. Janë asfaltuar mbi 10 kilometra rrugë janë ndërtuar mbi 20 kilometra kanalizime ndërsa janë investuar mbi 8 milionë euro investime në infrastrukturë nga qeveria . Prokurimi i Ferizajt i ka proceduar 18.4 milionë euro në 278 procedura me numër fare simbolik të ankesave. Po natyrisht kemi pasur edhe vështirësi e kufizime . Shumë nevoja të qytetarëve ende presin zgjidhje. Mirëpo unë kam besimin e patundur se do të arrijmë përherë e më shumë” tha në fjalën e tij kryetari Svarqa.
Pas paraqitjes së këtij raporti këshilltarët komunalë e komentuan në mënyra të ndryshme raportin , ndërsa pati edhe shumë pyetje e diskutime për çështje të ndryshme.
Në fund të mbledhjes drejtorët e ekzekutivit ferizajas dhanë sqarimet e tyre për secilin shqetësim që u ngrit ndërsa u dhanë zotime se aty ku ka pasur ngecje do të arrihen përmirësime
