Kryetari i Kuvendit të Kosovës, Kadri Veseli ka konfirmuar në konferencën për media pas mbledhjes së Kryesisë se seanca e demarkacionit do të mbahet më 1 shtator në orën 10:00.
Kryetari Veseli pas mbledhjes së Kryesisë së Kuvendit në të cilën ishte pikë e rendit të ditës edhe marrëveshja e demarkacionit, ka konfirmuar se seanca e rregullt plenare do të mbahet më 1 shtator në orën 10:00.
Ai në fillim të konferencës, u kërkoi falje gazetarëve për mos lejimin e tyre në mbledhjen e Kryesisë, duke thënë se janë krijuar konfuzione e keqkuptime.
Veseli gjithashtu ka kritikuar opozitën për veprimet e tyre, po ashtu duke kërkuar që të mos manipulojnë me veprime të tilla.
Hedhjen e gazit lotsjellës, Veseli e ka quajtur veprim fëmijëror.
Kryetari i Kuvendit, njëherësh edhe kryetari i PDK’së, ka treguar se kryesia e partisë që ai e drejton, në mënyrë unanime sot ka mbështetur votimin në Kuvend për demarkacion. Këtë përgjigje Veseli e dha kur u pyet nëse i ka numrat koalicioni PDK-LDK.
Në pyetjen që iu parashtrua nga gazetarët për konfliktin e sotëm që ndodhi në kufi të Kosovës me Malin e Zi, ai ka thënë se Mali i Zi ka qenë njëri nga vendet e para që ka njohur pavarësinë e Kosovës.
“I kujt është interesi që të krijoj konfrontime të tilla me Malin e Zi”, tha Veseli duke shtuar se Mali i Zi është një nga shtetet e para që njohu Kosovën pas shpalljes së pavarësisë më 17 shkurt 2008.
