Përfaqësuesit për Kosovë të kompanisë austriake “Blum”, z. Miroslav Stanonik dhe përfaqësuesja për Shqipëri e kësaj kompanie, znj. Violeta Gashi, vizituan Universitetin e Shkencave të Aplikuara në Ferizaj (UShAF), me ç’rast u pritën nga rektori, Prof. Dr. Agron Bajraktari.
Kompania ‘’Blum’’ dhuroi për UShAF makinën për shpuarje dhe aksesorë të ndryshëm, ku studentët do të kenë mundësinë që në mënyrë praktike të njihen me procesin e vendosjes së aksesorëve në mobilieri të ndryshme.
Gjatë këtij takimi u diskutua rreth mundësisë së angazhimit të një përfaqësuesi të ‘’Blum’’, i cili do të bëjë trajnimin e mësimdhënësve, të cilët më pastaj eksperiencat do t’i përcjellin tek studentët e UShAF, si dhe do të mbajë një ligjëratë për studentë.
Rektori Bajraktari i falënderoi përfaqësuesit e Kompanisë për mbështetjen që po i bëjnë Universitetit dhe tha se për studentët është shumë e rëndësishme që do të kenë mundësinë të punojnë dhe të njihen me produktet e kësaj kompanie.
