Komisioni për Buxhet dhe Financa i rekomandoi Ministrisë së Financave, që të bëjë transferin e mjeteve buxhetore për RTK-në për periudhën prill-qershor 2016.
Komisioni për Buxhet dhe Financa në mbledhjen e sotme, të drejtuar nga Naser Osmani, kryetar i Komisionit, shqyrtoi Raportin tremujor të shpenzimeve të Radiotelevizionit të Kosovës për periudhën janar–mars 2016 dhe Programin e Shpenzimeve të RTK-së, për periudhën Prill-Qershor 2016.
Raporti tremujor financiar e prezantoi dhe arsyetoi kryesuesi i Bordit të RTK-së, Ismet Behxheti, i cili theksoi se gjatë periudhës raportuese, RTK në pajtim me planin e veprimit ka arritur që shpenzimet t’i realizojë brenda buxhetit të planifikuar. Pas diskutimeve dhe sqarimeve, Komisioni përkrahu Raportin tremujor të shpenzimeve të Radiotelevizionit të Kosovës për periudhën janar–mars 2016 dhe i rekomandoi Ministrisë së Financave, që të bëjë transferin e mjeteve buxhetore për RTK-në për periudhën prill-qershor 2016.
Komisioni, po ashtu në mbledhjen e sotme, në pikën në të ndryshme, caktoi tre deputetë të komisionit, që do të jenë pjesë e grupit të përbashkët punues me Komisionin për Administratë Publike, Qeverisje Lokale dhe Media, për ndryshimin dhe plotësimin e Ligjit për Radiotelevizionin e Kosovës.
