Këto mjete janë në 9 milionëshin, të cilin as në institucionin që menaxhon me pensionet nuk ia kanë idenë se kujt i takojnë, raporton KTV.
Të njëjtat mjete ka me vite të tëra që janë transferuar në llogarinë e fondit, por nuk kanë asnjë informatë se për kë janë të destinuara.
Përkundër zhurmës së bërë, qeveria ia ndërroi ligjin, përmes të cilit mundësoi përvetësimin e këtyre mjeteve.
Në bazë të ndryshimeve të bëra, të gjitha mjetet që kanë 6 vjet që qëndrojnë në fond do të dalin në ATK, rrjedhimisht në Buxhetin e Kosovës.
Zyrtarë të Fondit të Kursimeve Pensionale nuk kanë pranuar të japin detaje para kamerës për këtë çështje.
Përmes një përgjigjeje elektronike, ata kanë dhënë disa detaje për çështjen e këtyre mjeteve.
Megjithëse thonë të kenë ndërmarrë një fushatë informuese në fund të vitit të kaluar, numri i të interesuarve që kanë dorëzuar dëshmi për mjetet ka qenë tejet minimal.
Andaj, duke e parë këtë situatë, Fondi ka marrë si dëshmi se janë shterur të gjitha mundësitë të gjinden informacione për pagesat e kryera prej 2010 e më herët.
Zyrtarë të fondit kanë thënë se kontribuuesve do t’iu ruhet, pa asnjë kufizim kohor, e drejta që t’iu rimbursohen kontributet kurdo që këtë e dëshmojnë.
Edhe zyrtarë të Administratës Tatimore të Kosovës kanë thënë se mjetet që do të kthehen do të qëndrojnë në një llogari si pozicion i veçantë.
Duke parë se mjetet nuk kanë një destinim të veçantë se ku do të shkojnë, shoqëria civile kërkon kujdes të shtuar për këtë çështje.
Ligji me ndryshime u miratua në dhjetorin e vitit të kaluar, ndërsa hyri në fuqi gjatë janarit të këtij viti.
