Ferizaj 2 gusht 2025 – Me një koncept unik dhe frymëzuar nga natyra, Shoqata e Karikaturistëve HITHI inauguroi më 2 gusht ekspozitën e veçantë “Lybeteni 2025” në majën e malit Lybeten. Hapja e ekspozitës u zhvillua në orët e para të mëngjesit, duke u lidhur simbolikisht me ditën pagane të Aligjynit, një festë tradicionale që nderon lidhjen me natyrën dhe peizazhet malore.
Në këtë ekspozitë u prezantuan punime të përzgjedhura nga artistë ndërkombëtarë, të cilët sollën një diversitet të gjerë stilistik dhe ideve në fushën e karikaturës. Organizatorët nënvizuan se “Lybeteni 2025” është ekspozita e parë e këtij lloji që zhvillohet në një vend kaq të veçantë, duke krijuar një urë mes artit, natyrës dhe traditës.
Ky event konsiderohet si një hap i rëndësishëm në promovimin e karikaturës si një formë arti që del përtej mureve të galerisë klasike, duke theksuar potencialin krijues për të eksploruar hapësira të reja artistike.
