Kadri Veseli do të jetë kandidat i koalicionit PDK-AAK-Nisma për Kryetar të Parlamentit të Kosovës.
Partia Demokratike e Kosovës, Aleanca për Ardhmërinë e Kosovës dhe Nisma për Kosovën bashkërisht kanë vendosur që Veselin ta propozojnë për këtë post.
Lajmin e ka bërë të ditur nënkryetari i PDK-së, Rexhep Hoti, për Televizionin Publik të Kosovës.
“Kandidat për Kryetar të Kuvendit do të jetë sërish Kadri Veseli”, ka thënë Hoti.
Kryetari i Parlamentit të Kosovës, sipas Kushtetutës, propozohet nga grupi më i madh parlamentar dhe zgjedhet më shumicën e votave të të gjithë deputetëve.
Pra Veselit i nevojiten të paktën 61 vota, të cilat ende nuk dihet nëse koalicioni PAN i ka.
Kryeparlamentari në të kaluarën është votuar edhe nga deputetët e opozitës – siç ishte rasti me ish-kryeparlamentarin, Jakup Krasniqin.
Veselin vështirë ta votojë dikush nga koalicionet e partitë tjera.
Albin Kurti, kandidat i Vetëvendosjes për kryeministër, i pyetur në Zona e Debatit në Klan Kosova, nëse do ta votonin Veselin po që se ai kandidohet nga PAN-i, Kurti është përgjigjur negativisht.
Sipas Kurtit, Veseli s’mund ta bëjë punën e kryetarit të Kuvendit.
Ai ka shtuar se nëse PAN propozon dikë tjetër nga radhët e tyre, atëherë Vetëvendosje do ta votonte atë, njofton Klan Kosova.
