Grupi i infermiereve nga Qendra Kryesore e Mjekësisë Familjare në Ferizaj dhe qendrat e tjera të cilat realizojnë vizita shtëpiake për nëna dhe fëmijë dhe me këtë rast japin këshilla të dobishme ka dalë të jetë më i miri në Kosovë nga një hulumtim i organizuar së fundi për këtë çështje.
Në një takim të mbajtur sot mes grupeve të këtyre infermierëve, zyrtarëve të komunës së Ferizajt , udhëheqësve të organizatës UNICEF dhe punonjësve të tjerë shëndetësor u bë e ditur se grupi i këtyre infermiereve për pak muaj ka përmbushur 97 përqind të objektivave të përcaktuara dhe rezultatet nga tereni janë mjaft të kënaqshme.
Ushtruesja e detyrës së drejtorit të QKMF-së Ibadete Bucaliu Ismajli ka thënë me këtë rast se janë zbatuar me përpikëri standardet e programit dhe tani Ferizaj duhet të merret si shembull për komunat e tjera.
“Ky program i ka standardet e veta dhe ne jemi mundu me i respektu duke i decentralizu shërbimet e gjithë rrjetit të kujdesit parësor shëndetësor. Grupi i këtyre infermiereve është plotësisht funksional dhe ka vizita të përditshme nëpër shtëpi ndërsa ne në të ardhmen mendojmë që ta zgjerojmë dhe ta fuqizojmë sa më shumë” u shpreh drejtoresha Ismajli e cila dukej mjaft e kënaqur nga këto arritje.
Edhe përfaqësues të organizatës ndërkombëtare UNICEF lavdëruan punën e bërë nga punonjësit shëndetësor në Ferizaj. Ata treguan se kjo organizatë ka qenë një mbështetëse e programit, por që edhe entuziazmi i infermierëve në Ferizaj dhe në komunat tjera ka bërë të suksesshëm këtë projekt.
“Lirisht mund të themi se Ferizaj ka ec larg me shërbimin e vizitave shtëpiake dhe këtë e ka bërë zbatimin me përpikëri I programit e këmbëngulësia e këtyre punonjësve. Mbështetja jonë nuk do të mungojë prandaj shpresojmë . në rezultate edhe më të mira “ tha Dr. Agron Halitaj.
Vizitat shtëpiake në teren janë bërë së fundi një shërbim mjaft i qëlluar sepse qytetarët tashmë e kanë një adresë të afërt për këshillime shëndetësore, por edhe roli i infermierëve po fuqizohet edhe më tutje.
Në takimin e sotëm u diskutuan përvojat e infermierëve të këtij shërbimi nga 8 komunat e Kosovës dhe u kërkua më shumë përkrahje në tejkalimin sfidave që paraqet puna në teren.
