Ferizaj.26.03.2018. Nisma e Kryetarit të Komunës së Ferizajt, Agim Aliu dhe e zbatuar nga Inspektorati Komunal për lirimin e hapësirave publike me qëllim qarkullimin e lirë të qytetarëve, sot është bërë largimi i tezgave statike në zonën qendër, derisa nesër dhe ditëve në vijim do të vazhdohet edhe me largimin e shitësve ambulant, tezgave lëvizëse në gjithë zonën qendër.
Këtij aksioni i ka paraprirë njoftimi me shkrim i pronarëve të tezgave një javë më parë përmes së cilës i është bërë e ditur se afati për largimin e tyre vlen deri më 25 mars në të kundërtën malli do t’i konfiskohet dhe procedohet sipas rregullativës ligjore në fuqi.
Agim Aliu, Kryetar i Komunës së Ferizajt me këtë rast është shprehur: “Sheshet janë të qytetarëve, dhe jo hapësira biznesi që pengojnë qarkullimin e lirë të qytetarëve. Vërtetë ka qenë një pamje e vrazhdë në dy sheshet kryesore të zonës qendër. Ne kemi urdhëruar lirimin e hapësirave publike brenda një afati optimal kohor. Shumica nga pronarët e tezgave kanë larguar ato në mënyrë vullnetare, për të cilën gjë i falënderoj. Sheshet do t’i kthejmë në hapësira qarkullimi të lirë të qytetarëve edheme investimet që parashohim t’i bëjmë në të ardhmen e afërt. Është koha e fundit të kthejmë rendin dhe rregullin në hapësira publike dhe ky aksion dhe aksionet e mëparshme në segmente tjera dëshmojnë vendosmërinë tonë për të krijuar hapësirë të lirë qarkullimi për qytetarët” shtoi kryetari Aliu.
Në anën tjetër, Ridvan Berisha, koordinator i Inspektoratit Komunal lidhur me këtë aksion ka deklaruar “Nisma e Kryetarit të Komunës, Agim Aliu për lirimin e hapësirave publike është duke u zbatuar plotësisht. Ne kemi dërguar inspektorët komunal në gjithë zonën qendër ku i kemi njoftuar pronarët për këtë aksion. Vlen të theksohet se kemi hasur edhe në mirëkuptimin e tyre. Inspektorati Komunal, kohëve të fundit është fuqizuar tej mase, natyrisht me mbështetjen e Kryetarit të Komunës, Agim Aliu. Aksionet tona janë të shpërndara në disa segmente dhe po punohet vazhdimisht. Besojmë fuqishëm në rikthimin e shpejt të rregullit dhe zbatueshmërisë së ligjit në të gjitha fushat ku po zhvillojmë inspektime” theksoi Berisha.
Qeverisja lokale e udhëhequr nga Kryetari i Komunës, Agim Aliu ka menduar edhe për aspektin e mirëqenies sociale për këta pronarë duke ofruar mundësi punësimi për ta dhe riorganizimin e vendosjes së tezgave në një hapësirë tjetër më të përshtatshme, të autorizuar nga Komuna e Ferizajt.
Aksioni për lirimin e hapësirave publike është në vazhdën e shumë veprimeve të ndërmarra nga ekzekutivi komunal për të garantuar mbrojtjen e interesit qytetar, gjegjësisht qarkullimin e tyre pa pengesa, siç është aksioni për eliminimin e deponive ilegale të mbeturinave, heqja e panove reklamuese në disa nga rrugët e komunës sonë si dhe një varg veprimesh që rrisin nivelin e sigurisë për qytetarët dhe kthejnë rregullin sipas parashikimeve ligjore në fushat përkatëse.
