“Jam gati të dal nga pylli dhe të ndihmoj kombin e përçarë”. Kështu ka deklaruar ish-kandidatja demokrate për Shtëpinë e Bardhë, Hilary Clinton.
Gjatë një takimi para komunitetit irlandezo-amerikan në vendlindjen e babait të saj, Scranton në Pennsylvania, me rastin e festës së Shën Partrikut, ajo u shpreh:
“Unë nuk besoj se duhet të lejojmë që ndasitë politike të ashpërsohen e të kthehen në ndasi personale. Ndaj ne thjesht nuk mund ta injorojmë dikë e t’i kthejmë kurrizin vetëm sepse nuk jemi politikisht dakord me të”, tha ish-Sekretarja e Shtetit, transmeton OraNews.
Deklarata e ish-Sekretares së Shtetit duket se i referohet periudhës pas humbjes në zgjedhjet presidenciale përballë kandidatit republikan Donald Trump, ku ajo ishte parë shpesh herë të shëtiste vetëm në pyllin Chappaqua në New York.
Rivalja e ashpër e Trump gjatë fushatës elektorale bëri thirrje për unitet dhe për përpjekje të përbashkëta për të kuptuar ndasitë dhe bashkëpunimin për të gjetur të përbashkëtat që çojnë vendin përpara.
