Kryeministri Ramush Haradinaj ka thënë se Mogherini e ka kryer punën e vet dhe që nga Samiti në Bruksel ajo është larguar nga ndërmjetësimi i dialogut Kosovë-Serbi, përcjellë Indeksonline.
Sipas Haradinaj, në samitin që është mbajtur javë më parë në Tiranë, Mogherini me përsëritjen e kërkesës për heqjen e taksës në mënyrë që të vazhdojë dialogu ka ftuar që ta ndajë Kosovën.
Me largimin e Mogherinit, sipas kreut të ekzekutivit, nuk rrezikohet ndonjë propozim tjetër për ndarje.
“Me rëndësi është që procesi është në duar të sigurta i është hjek zonjës Mogherini nuk rrezikojmë ndonjë propozim për ndarje”.
“Mogherini tha në Tiranë hjekni taksën se ua ndajë Kosovën, si ta hjekin taksën unë e mbajë takimin. Sheqyr zotit kem qëlluar që i kem lexuar këto me kohë, nuk hjeket taksa, Mogherini e ka kry punën e vet”.
“Janë detyru nivelet me të larta të BE-së me heq dialogun nga Mogherini që shkonte nga ndarja dhe tani vendimmarrja u kthye në Prishtinë ne do i marrim vendimet”, tha Haradinaj.
Në konferencën e mbajtur pas mbledhjes së qeverisë, Ramush Haradinaj ka komentuar edhe zërat se ka rrezik që në çështjet e Kosovës të përfshihet edhe Rusia.
“Rusia është tërhjek prej Ballkanit, ne nuk e parashohim në asnjë agjendë tonën Rusinë, ne nuk jemi pjesë e botës së Rusisë por e botës së Amerikës. Nuk është Amerika që përjashtohet. Nuk mundet me përjashtuar askush Amerikën”.
Sa i përket deklaratave të Dick Martyt se ka prova të reja për të shpalosur, kreu i qeverisë ka thënë se deklarimet e tilla nuk i ndihmojnë drejtësisë.
“Ka një gjykatë, i pastron gjykata, këto deklarimet publike, politike nuk i ndihmojnë drejtësisë”. /Indeksonline/
