Gani Bajraktari, përmes një shkrimi në rrejetin social Facebook ka njoftuar se ka marrë vendimin e Gjykatës Themelore në Prishtinë, e cila vlerësoi se shkarkimi tij nga pozita e Dekanit të Fakultetit të Mjekësisë në vitin 2011 ishte i jashtëlighshëm.
“Se ky vendim, i shkruar aq joprofesionalisht, në kundërshtim me të gjitha ligjet vendore e universale, i pazakontë për shekullin aktual, ishte i jashtëligjshëm nuk paraqet lajm për mua, ngaqë një gjë e tillë ishte e ditur për mua dhe për të gjithë ata që e kishin parë që ditën e firmosjes së tij”, ka shkruar mes tjerash Dr. Bajraktari, i cili ka paralmëruar se kjo është fitorja e parë, njofton Teleskopi.net.
Ja postimi plotë i Doktor Gani Bajraktari:
Fitorja e parë Të dashur miq, Këto ditë mora Vendimin e Gjykatës Themelore në Prishtinë, e cila vlerësoi se shkarkimi im nga pozita e Dekanit të Fakultetit të Mjekësisë në vitin 2011 ishte i jashtëlighshëm.
Se ky vendim, i shkruar aq joprofesionalisht, në kundërshtim me të gjitha ligjet vendore e universale, i pazakontë për shekullin aktual, ishte i jashtëligjshëm nuk paraqet lajm për mua, ngaqë një gjë e tillë ishte e ditur për mua dhe për të gjithë ata që e kishin parë që ditën e firmosjes së tij. Madje, besoj se lajm nuk paraqet as humbja meteriale e 7-8 mijë eurove (pagesë e dyfishtë!) që do të paguajë Universiteti i Prishtinës (UP), për shkak të një Vendimi të tillë qesharak, ngaqë ky institucion në kohën e menaxhimit të nënshkruesit të këtij vendimi kishta paguar lloj-lloj shuma parash (përfshirë edhe pagesa Dilpomash për cilësi të UP-së!). Kësaj here nuk do shkruaj as për motivacionet e shkarkimit tim nga posti i Dekanit, në kohën kur Fakultetit i Mjekësisë kishte rezultatet më të mira të mësimdhënjës që nga paslufta e deri në momentin kur po e shkruaj këtë shkresë, meqë ato i kam shkruar në detaje më herët. Natyrisht, skenari ishte përgatitur mirë dhe me kujdes në “Laborator”, i cili duke gjetur edhe pretekstin – anulimin e provimit pranues (pa pasur asnjë ankesë nga askush dhe pa pasur asnjë shkelje ligjore) pavarësisht se për herë të parë në historinë e Fakultetit u përgatit shpallja e rezultateve ditën e provimit.
Ky plan ishte përgatitur dhe orkestruar në detaje dhe qëllimi i tij u zbulua më vonë: regjistrimet masive të papara dhe të padëgjuara ndonjëherë e ndokund, të orkestruara nga firmosësi i Vendimit. Mirëpo, njeriu që e kishte firmosur atë vendim atëbotë nuk qante kokën për ligjëshmërinë dha paarsyeshmërisë tepër transparente: ai kishte agjendën e tij, të cilën e çoi deri në fund – agjendën anarkike në Universitet! Ky ishte Mujë Rugova, ish-rektori kontraverz i Universitetit të Prishtinës (UP), i cili sigurisht se do të mbahet në mend gjatë për të bëmat e tij, në periudhën sa ai administroi me këtë institucion, që dikur ishte krenaria jonë. Anarkinë që kishte kapluar në këtë periudhë UP-në, jam i sigurt se nuk do të mund ta parashifte as vet Bakunini, themeluesi i anarkizmit: Regjistrimet masive (së paku trefishimi i kuotave në Fakultetin e Mjekësisë, pranimi në Fakultet të Mjekësisë i kandidatëve me zero pikë, me minus pikë, pa hy fare në provim pranues, etj, etj), punësimet e jashtëligjshme, avansimet e jashtëligjshme, pranimet e stafit akadamik jashtë çdo kriteri, punësimet pa konkurs, shpërdorim i parasë publike. Me një fjalë nuk kishte asnjë lloj parregullësie që mendja e njeriut (të shëndoshë e të sëmurë) mund të kapte, e të mos e kish aplikuar Muja.
E kisha kundërshtuar çdoherë, sa herë që më ipej raste: vetëm në një mbledhje Senati ia kisha numëruar 13 shkelje të rënda statutare që kishin të bënin me Fakultetin e Mjekësisë (pa numëruar shkeljet e panumërta që në atë mbledhje kishte bërë me Fakultetet tjera), e kisha njoftuar zyrtarisht se kishte pranuar dy studente në Farmaci pa hyrë fare në provim!, e kisha kundërshtuar rritjen e kuotave të regjistrimeve në Fakultet, e plot kundërshtime tjera. Për shkeljet, parregullësitë, dhe këto të bëma të Mujës, e kisha njotuar me kohë dhe zyrtarisht (me protokol) Ministrin e atëhershëm të Arsimit dhe Këshillin Drejtues të UP-së, nga të cilët asnjëherë nuk mora përgjigje! Si duket kundërshtimet e mia ishin reagensa të mirë të “Laboratorit” për orkestrimin e shkarkimit tim. Zëvëndësi im i përzgjedhur nga Muja, pavarësisht se studentët “tekanjoz” e kishin etiketuar lidhur me pasigurinë e tij për praninë ose jo të bërthamës në eritrocite, ishte i përkryer në ekipën e “Laboratorit”, duke arritur rezultate të shkëlyqeshme bashkëpunimi, madje duke tejkaluar edhe pritjet e Mujës. Skandali i arrestimit të studentëve lidhur me regjistrimet e paligjshme, duke amnistuar firmosësit e këtyre regjistrimeve, është shëmbëlltyra më e mirë e bashkëpunimit korrekt të udhëheqësve institucional në agjenden e tyre!
Nuk ishte ndonjë problem për Mujën as fakti që shkenca e ekipës së emëruar nga ai nuk e kishte kaluar Elez-Hanin, dhe se ata ndërkombëtarë që do të vizitonin Fakultetin e Mjekësisë duhet të merrnin përkthyes me vete! Mujë Rugova, kishte shkelur aq shumë ligjin duke bërë vepra të shumta penale, për të cilat unë i kisha bërë kallëzim penal në të gjitha Prokuroritë e vendit, të cilat asnjëherë nuk më kanë ftuar për të dëshmuar (përveç Kryeprokurit të EULEX-it, i cili zyrtarisht më ka informuar se çështjen e kanë adresuar në Prokurorinë Themelore). Në fakt bazuar ne kundërshtimet e mia te zgjedhjeve, avansimeve, regjistrimeve të paligjshme (duke atakuar edhe figura me ndikim në jetën publike dhe politike), nuk çuditem fare për heshtjen e institucioneve të drejtësisë. Madje edhe orkestrimet e këtij viti ndaj meje, unë jam i sigurt që aty e kanë origjinën. Mirëpo, për këtë nuk do shkruaj kësaj radhe.
Të dashur miq, Fitorja (e vonuar) e drejtësisë për mua, në asnjë mënyrë nuk mund të kompensojë denigrimin e mësimdhënjës, katandisjen e saj deri në atë shkallë, saqë do të quhej sukses spektakolar i Rektorit aktual, nëqoftëse ai do të mund ta kthejë UP-në në nivelin ku e mori Mujë Rugova. Shumë të zorshme e ka të arrijë këtë pikëmbërritje, sepse denigrimi i asaj kohe ishte i përmasave që askush nga ata që nuk janë brenda UP-së nuk mund ta imagjinojnë. Natyrisht, një padi private për dëmtim të imazhit (anipse asgjë në jetë nuk më bënë më të lumtur se fakti që nuk isha pjesë e “ekipës” së tij) Mujë Rugovës do ia bëjë në ditët në vijim. Uroj që të këtë jetë të gjatë, në mënyrë që drejtësinë e vonuar në Kosovë ta fitojë edhe një herë. Uroj që Fakulteti i Mjekësisë dhe UP të kthehen aty ku ishin dhe të avansahon lartë e më lartë: ato ishin dhe duhet të janë krenaria jonë. Do të përpiqem me krejt qenien time që të jap kontributin tim për këto institucione, me të cilat jam jetësisht i mishëruar dhe nuk ka arritë dhe nuk do arrijë të më pengojë asnjë Mujë! Me shumë respekt për Ju, GB
