Fshatrat Sojevë, Dardani dhe Zllatar të komunës së Ferizajt, ditëve të fundit janë bërë cak i hajdutëve.
Njëri ndër banorët e shumtë të këtyre fshatrave të cilët kanë shprehur shqetësim për këtë është edhe Habib Sojeva nga fshati Sojevë i Ferizajt, të cilit tri ditë më parë i është vjedhur një veturë e tipit Golf 4, në garazhin e tij.
Në po të njëjtën datë, hajnat kanë hyrë edhe në auto-servisin e Halim Sallahut nga fshati Dardani. Nga aty Sallahu thotë se i është vjedhur një laptop në vlerë rreth 1300 euro.
Ndërsa përfaqësuesit e fshatit Sojevë dhe Zllatar, thonë se Policia duhet të shtoj kontrollin nëpër fshatra, pasi sipas tyre, ka muaj që nëpër fshatrat e tyre nuk kanë parë ndonjë patrullë të Policisë.
E në Policinë e Rajonit të Ferizajt, thonë se janë në dijeni për këto vjedhje mirëpo deri më tani nuk është arrestuar asnjë i dyshuar për këto raste.
Sipas Policisë së Kosovës në Ferizaj, gjatë këtij viti në këtë zonë janë zbuluar 6 raste të vjedhjeve,transmeton Televizioni Tema.
