Projekti për ndërtimin e Impiantit për Trajtimin e Ujërave të Zeza në Rajonin e Ferizajt, i nisur vite më parë nga Komuna e Ferizajt, është tashmë në fazën e fundit, para nisjes së punimeve, si rrjedhojë e marrëveshjes me BERZH-in, për të cilin projekt, Kryetari i Komunës së Ferizajt, Agim Aliu, mori konfirmimin për mbështetje të këtij projekti nga drejtori i Zyrës për Kosovë të BERZH-it, z. Sergiy Maslichenko, në takimin e 8 gushtit të këtij viti.
Padyshim, realizimi i këtij projekti është një lajm i mirë për Ferizajn e ferizajasit, ku kreu komunal u angazhua për vite për jetësimin e këtij projekti, fillimisht si rrjedhojë e kredisë nga Qeveria Hungareze e që për neglizhencë të Ministrisë së Financave u pamundësua realizimi, për të vijuar tash me marrëveshjen e re kreditore me Bankën Evropiane për Rindërtim dhe Zhvillim (BERZH).
Për fat të keq, në ceremoninë e nënshkrimit të sotëm të kësaj marrëveshje në Ministrinë e Financave, nuk u ftua Komuna e Ferizajt, edhepse është hisedare e kësaj marrëveshje, duke marr përsipër shpronësimet e të gjitha lehtësirat administrative, ku edhe morëm sot nga zyra e BERZH-it letër konfirmimin për nënshkrimin nga Komuna si palë e marrëveshjes, megjithatë përtej ngarendjes për përvetësim e personalizim të këtij projekti nga kreu i Ministrisë së Financave, ferizajasit e dijnë të vërteten dhe veprimet e institucionit të Komunës, duke bërë të gjitha detyrat tona që ky projekt të nis së zbatuari, thuhet në njoftimin lëshuar nga komuna e Ferizajt.
