Paraditen e sotme, në ambientet e Kuvendit të Komunës, Kryesuesja e Kuvendit të Komunës, Kristina Gashi Bytyçi shoqëruar edhe nga drejtorja e Administratës së Përgjithshme, Aurora Ramadani Abazi, mbajtën diskutimin publik të draft Rregullores së re për Transparencën në Komunën e Ferizajt.
Ky dokument vjen pas kërkesës së Ministrisë përkatëse për të bërë ndryshimet e nevojshme konform legjislacionit të ri të miratuar në këtë fushë. Qytetarët pjesëmarrës në këtë diskutim, u shprehën me nota pozitive në lidhje me nivelin e transparencës komunale, por njëkohshëm paraqiten edhe kërkesat e tyre që të përfshihen në draftin final të këtij dokumenti të rëndësishëm për Komunën e Ferizajt.
Drejtueset e këtij diskutimi publik, Kryesuesja Gashi Bytyçi dhe drejtorja Ramadani Abazi, thanë se do të përfshihen sugjerimet e marra sot nga ky diskutim publik, që të rritet pjesëmarrja e qytetarëve në proceset vendimmarrëse, të zgjerohet mundësia e monitorimit të punës së Komunës së Ferizajt nga të gjithë të interesuarit si dhe të përfshihet në këtë komponentë edhe puna e Kryetarëve të Fshatrave dhe Zonave Urbane.
