Ferizaj sot u bashkua me mbarë kombin shqiptar në shënimin e 28 Nëntorit, ditës më të rëndësishme të historisë sonë kombëtare, ditës së flamurit, pavarësisë dhe lavdisë së popullit shqiptar. Në këtë ditë të shenjtë, institucione, qytetarë, familjarë të dëshmorëve, veteranë dhe përfaqësues të organizatave të ndryshme u mblodhën për të nderuar rrugëtimin e gjatë të kombit drejt lirisë, drejtësisë dhe shtetformimit.
Aktivitetet përkujtimore nisën me homazhe pranë varrezave të dëshmorëve dhe memorialeve të luftës, duke nderuar heronjtë e të gjitha epokave që flijuan jetën për idealin e lirisë. Në këtë atmosferë të mbushur me kujtesë e respekt, u rikujtuan ngjarjet madhore që përkojnë me 28 Nëntorin — ditë e cila bashkon në vetvete disa momente kulmore të historisë shqiptare.
Kryetari i Ferizajt, Agim Aliu, me rastin e kësaj dite, theksoi domethënien historike të 28 Nëntorit:
“Në 28 Nëntorin e lavdisë e krenarisë kombëtare, në 28 Nëntorin e ngritjes së flamurit arbëror në Krujën e Kryetrimit Gjergj Kastrioti – Skënderbeu, në 28 Nëntorin e Flamurit Kombëtar e shpalljes së Pavarësisë Kombëtare në Vlorë nga ati themelues i shtetit shqiptar, Ismail Qemali, në 28 Nëntorin e ditëlindjes së Komandantit Legjendar të Ushtrisë Çlirimtare të Kosovës, Adem Jashari dhe 28 Nëntorin e daljes publike të ushtrisë së lirisë – emblemës sonë të lirisë – Ushtrisë Çlirimtare të Kosovës, me homazhe nderuam kujtimin e veprën heroike të Dëshmorëve të Kombit, gjakut që ndër epoka u flijua për lirinë e shqiptarëve, lirinë e Kosovës, shtetin shqiptar, Republikën e Kosovës.”
Kjo ditë përmbledh kapitujt më të ndritur të historisë sonë:
Ngritjen e flamurit nga Gjergj Kastrioti – Skënderbeu në Krujë, simbol i qëndresës dhe identitetit kombëtar.
Shpalljen e Pavarësisë më 1912 në Vlorë nga Ismail Qemali, momenti themelor i shtetit shqiptar.
Ditëlindjen e Komandantit Legjendar Adem Jashari, simbol i sakrificës dhe lirisë së Kosovës.
Daljen publike të Ushtrisë Çlirimtare të Kosovës, ushtrisë që realizoi aspiratën e popullit për liri dhe dinjitet.
Homazhet dhe manifestimet në Ferizaj nuk ishin vetëm rit ceremonial, por edhe shprehje e ndërgjegjes së gjallë historike, e falënderimit dhe respektit ndaj të gjithë atyre që me gjakun e tyre hapën rrugën drejt shtetit dhe identitetit të sotëm kombëtar.
Në përmbyllje të fjalës së tij, kryetari Aliu shtoi:
“Lavdi përjetë Dëshmorëve të Kombit e të rënëve për lirinë në çdo periudhë historike! Urime bashkëkombës, 28 Nëntori – Festa jonë kombëtare!”
Ferizaj, ashtu si çdo qytet shqiptar, e shënoi këtë ditë me krenari, me flamuj, me aktivitete kulturore dhe me besimin se sakrifica e brezave të kaluar është obligimi ynë për të ndërtuar një të ardhme të denjë, të lirë dhe të bashkuar.
Gëzuar 28 Nëntorin – Ditën e Flamurit dhe të Pavarësisë!
