Nëse jeni një person shumë i zënë me punë, por ju dëshironi të dukeni bukur dhe mbi të gjitha të jeni të shëndetshëm bëjeni këtë veprim.
Ecni.
Ky aktivitet po bëhet çdo ditë e më i rëndësishëm për njerëzit – sidomos ecjet e gjata në natyrë.
Jo vetëm se do të ndjeheni mirë, por gjatë këtyre ecjeve do të mësoni më shumë për vendet që i vizitoni, kulturën dhe njerëzit e mirë që gjithmonë i takoni.
Bëjeni pasi ecja u jep një emocion të veçantë, madje shpesh ju bën që t’i tejkaloni limitet fizike ashtu edhe ato mendore!
Po sepse tek ecni ju harron gjithçka të keqe, heqni stresin e akumuluar gjatë javës, shijoni çdo hap, ndonëse shpesh bëhen me vështirësi – mbi të gjitha natyrën e keni gjithmonë aty pranë.
Ecje të tilla organizohen shpesh në Kosovë, sidomos nga stina e pranverës deri në përfundim të verës, njofton Klan Kosova.
Kështu edhe këtë pranverë ferizajasit organizuan “Ecjen Pranverore”,e cila tashmë është organizuar për të katërtin vit me radhë.
Ky organizim bëhet me qëllim të promovimit dhe të ruajtjes së turizmit malor në rajonin e Ferizajt.
Këtë vit ecja është realizuar në zonën malore të Syrinikës (Malet e Sharrit), konkretisht në Bjeshkët e Burrnikut.
Pjesëmarrës në këtë ecje ishin mbi 230 bjeshkatarë dhe dashamirë të natyrës, klube dhe shoqëri bjeshkatare nga shumë qytete.
Ata ecën në shtegun e gjatë rreth 13.1 km, nga ora 08:00 deri në 17:00 të mbrëmjes, njofton Klan Kosova.
Ecja është organizuar nga Shoqëria Bjeshkatare Alpiniste “Lybeteni” nga Ferizaj, e cila u mbështet edhe nga bjeshkatare si: ShBA Prishtina, ShBA Guri i Shtrenjtë Shtime, ShBA Dardana, Klubi Alpin Gjilani, Klubi Alpin Bujanoci, ShBA Kaçaniku, Klubi Alpin Hani i Elezit, ShBE Shkupi si dhe te gjithë dashamirët e natyrës.
