Se qeverisja lokale është e përkushtuar në mbrojtjen e mjedisit, tregojnë shembujt e përditshëm të aksioneve në mbrojtje të mjedisit.
Një deponi ilegale me mbeturina me shtrirje të gjerë është eliminuar këto ditë nga punëtorët e Kompanisë “Pastërtia” dhe Ndërmarrjes “Ambienti”.
Kjo deponi me mbetje inerte, amvisërie, të ngurta dhe të tjera e lokalizuar në fshatin Gurëz dhe Rakaj, ishte edhe pjesë e raportimeve mediale dhe pakënaqësisë së banorëve të kësaj zone.
Drejtoria e Shërbimeve Publike dhe Emergjencë, përmes punonjësve të palodhshëm të ndërmarrjeve publike të lartcekura, me makineri të rëndë, ka intervenuar menjëherë në eliminimin e kësaj deponie e cila shkaktonte përveç dëm mjedisor edhe vështirësi e burim infeksioni për banorët që qarkullojnë çdo ditë në këtë rrip tokësor.
Për këtë, kërkohet ndërgjegjësimi i qytetarëve që të ruhet mjedisi, të mos shkaktohet ndotje në zonat periferike dhe zonën qendër si dhe zbatimi rigoroz i gjobave mandatore të cilat po zbatohen nga autoritetet lokale ndaj të gjithë ndotësve të mjedisit.
Komuna e Ferizajt, fton gjithë qytetarët që të denoncojnë rastet e tilla pranë autoriteteve, me qëllim që të merren masat konform ligjit për ndotësit si dhe të mirëmbahen hapësirat tona të përbashkëta.
