Pas shkrimeve në media për shpërndarje të mjedrave të sëmura, Drejtoria Bujqësisë në Ferizaj, ka dhënë një sqarim për përfituesit e këtyre mjedrave, e cila këto akuza i ka quajtur shkrime të motivuara politikisht dhe synime sensacionaliste për të krijuar afera të paqena.
Sqarimin e plotë të Drejtorisë së Bujqësisë mund ta lexoni në vazhdim;
Sqarim i Drejtorisë së Bujqësisë
Drejtoria e Bujqësisë e Komunës së Ferizajt dëshiron të sqarojë publikun dhe fermerët, me rastin e publikimit të disa dezinformatave tendencioze e qëllimkëqija, lidhur me cilësinë e fidanëve të mjedrave, të shpërndarë si subvencion 50 fermerëve ferizajas më 3 dhjetor të këtij viti.
Drejtoria e Bujqësisë siguron fermerët dhe publikun se fidanët e shpërndarë më 3 dhjetor kanë qenë në gjendje të mirë shëndetësore. Këtë e vërteton analiza laboratorike fitopatologjike në laboratorin “Sara&Met”, i vetmi laborator i akredituar nga Ministria e Tregtisë dhe e Industrisë – Drejtoria e Akreditimit. Analizat i ka bërë profesori universitar prof.dr. Fadil Musa.
Drejtoria e Bujqësisë i konsideron shkrimin e gazetës “Koha Ditore” dhe reagimin e Degës së Lëvizjes Vetëvendosje në Ferizaj si të motivuara politikisht, ose synime sensacionaliste për të krijuar afera të paqena.
Drejtoria e Bujqësisë e Komunës së Ferizajt
