Paraditen e sotme është mbajtur dëgjimi buxhetor me drejtorët e shkollave fillore dhe të mesme të Komunës së Ferizajt, në kuadër të procesit të hartimit të buxhetit për vitin 2026. Takimi është organizuar nga Komuna e Ferizajt dhe ka pasur për qëllim identifikimin e nevojave dhe prioriteteve të institucioneve arsimore në territorin e komunës.
Në këtë takim ka marrë pjesë edhe drejtori i Drejtorisë së Arsimit, Afrim Llabjani, i cili në fjalën hyrëse theksoi rëndësinë e dëgjimeve buxhetore si një proces thelbësor për përfshirjen e drejtpërdrejtë të shkollave në planifikimin e buxhetit. Sipas tij, përmes këtyre dëgjimeve mundësohet një pasqyrë më e qartë dhe reale mbi sfidat me të cilat përballen shkollat, si dhe prioritetet që duhen trajtuar në vitin e ardhshëm.
“Dëgjimet buxhetore janë mundësi e mirë për të dëgjuar nga afër zërin e secilit institucion arsimor. Vetëm në këtë mënyrë mund të hartojmë një buxhet që pasqyron realisht nevojat e sektorit të arsimit në Ferizaj”, u shpreh drejtori Llabjani.
Gjatë takimit, drejtorët e shkollave paraqitën një sërë kërkesash konkrete që lidhen me përmirësimin e infrastrukturës shkollore. Ndër kërkesat më të shpeshta ishin: rregullimi i oborreve të shkollave, rehabilitimi i rrjetit të kanalizimit, shtimi i ankesve shkollore dhe renovimi i objekteve ekzistuese shkollore. Disa shkolla raportuan mungesë të hapësirave adekuate për zhvillimin e mësimit, ndërsa të tjera ngritën çështje që lidhen me mungesën e ngrohjes apo ndriçimit të mjaftueshëm në objektet shkollore.
Drejtoria e Arsimit u zotua se do t’i shqyrtojë me kujdes të gjitha kërkesat dhe brenda mundësive buxhetore, do të mundohet të përfshijë prioritetet e ngritura në planifikimet për vitin e ardhshëm.
Ky takim është pjesë e agjendës së dëgjimeve buxhetore që Komuna e Ferizajt po zhvillon me kategori të ndryshme të interesit publik, me synimin për të siguruar një proces gjithëpërfshirës, transparent dhe në përputhje me nevojat reale të qytetarëve.
