Sindikata e Bashkuar e Arsimit, Shkencës dhe Teknologjisë (SBASHK) në komunikatë për media ka thënë se derisa shkollat nuk do të punojnë të premten për shkak të protestës, ajo ka kërkuar nga anëtarësia në çerdhe mirëkuptim që të mos ndalet puna nesër.
“Në këtë protestë do të jenë edhe anëtarësia e SBASHK-ut nga të gjitha Universitetet e Kosovës, kurse nga anëtarësia jonë në çerdhe kërkojmë mirëkuptim në mënyrë që puna atje të mos ndalet nesër, por përfaqësues nga këto institucione të marrin pjesë në protestë pa e cenuar rrjedhën e procesit të punës në çerdhe”, thuhet në komunikatë të SBASHK-ut.
Të premten institucionet arsimore në vend nuk do të punojnë pasi Sindikata e Bashkuar e Arsimit Shkencës dhe Teknologjisë (SBASHK), ka vendosur që t’i bashkohet protestës së thirrur nga Bashkimi i Sindikatave të Pavarura të Kosovës.
Sipas kësaj sindikate, mësimdhënësit nga i gjithë vendi do të nisen drejt Prishtinës për të qenë pjesë e protestës.
