Arrestohet marinari egjiptian që mori peng anijen “Çelepia 2” dhjetë ditë më parë në portin e Durrësit. Adel M.Salam është arrestuar në Aleksandri, bën të ditur “Ora”. Arrestimi është kryer nga autoritetet egjiptiane pas kërkesës së Interpol Tiranës.
Ndërkohë, nuk dihet ende fati i dy peshkatarëve shqiptarë, Luan Mema dhe Dhimitër Malja, ndërsa dosja është në hetim nga Prokuroria e Krimeve të Rënda.
Gjendet anija e marrë peng
Gjendet në Egjipt peshkarexha shqiptare “Çelepia2”. Autoritetet egjiptiane e kanë gjetur anijen shqiptare të zhdukur prej 18 qershorit. Anija u gjet gjatë orëve të mbrëmjes së të hënës në brigjet e Aleksandrisë. Brenda bordit të anijes janë gjetur tre persona me kombësi egjiptiane.
Një ditë më parë, marinari egjiptian lëshoi kërcënimin e fundit ndaj pronarit të anijes.
Salam la orën 20:00 të së hënës si afatin e fundit që pronari i anijes të depozitonte në llogari shumën prej 70 mijë eurosh, në të kundërt kërcënoi se do të digjte mjetin lundures.
