Ferizaj.02.02.2018. Kryetari i Komunës së Ferizajt, Agim Aliu gjatë ditës së sotme ka pritur në takim deputetin e Kuvendit të Kosovës, Veton Berisha të shoqëruar edhe nga bashkëpunëtorët e tij.
Në këtë takim, deputeti Berisha uroi kryetarin Aliu për mandatin qeverisës dhe u diskutua për rolin e komunave në përmirësimin e cilësisë së jetës së komuniteteve joshumicë me theks të veçantë, komunitetit egjiptian.
Deputeti Berisha që përfaqëson komunitetin egjiptian në Kuvendin e Kosovës u shpreh optimist se përpjekjet e qeverisjes lokale në Ferizaj do të intensifikohen në trajtimin e kërkesave të komuniteteve joshumicë.
Në anën tjetër kryetari Aliu u shpreh se Ferizaj është qytet i diversitetit etnik e kulturor dhe se përpjekjet e Komunës së Ferizajt janë që të rritet kujdesi e shërbimet ndaj qytetarëve pa dallim, veçanërisht në komponentën e kujdesit dhe shërbimeve sociale.
Kryetari Aliu, gjithashtu, u shpreh i vendosur të thelloj bashkëpunimin me të gjithë përfaqësuesit e zgjedhur të popullit dhe brenda kompetencës lokale të trajtoj çështjet që arrijnë për shqyrtim në Komunën e Ferizajt.
