Bashkimi Evropian ka dalë kundër idesë së Turqisë për të rikthyer dënimin me vdekje, duke i rikujtuar Ankarasë se një akt i tillë nuk është në përputhje me Konventën Evropiane të të Drejtave të Njeriut.
Shefja e Politikës së Jashtme të BE-së, Federika Mogerini, tha se “asnjë vend nuk mund të bëhet anëtar i BE-së nëse zbaton dënimin me vdekje”. Mogerini theksoi se Turqia është anëtare e Këshillit të Evropës dhe nënshkruese e Konventës Evropiane për të Drejtat e Njeriut, e cila ndalon dënimin kapital në gjithë kontinentin.
Presidenti turk Rexhep Tajip Erdogan, ka thënë se ekziston mundësia që në vend të kthehet dënimi me vdekje pas përpjekjes për grushtin e shtetit. Deri më tani autoritetet turke kanë prangosur 7.500 persona, mes të cilëve ushtarakë të lartë dhe gjykatës, të dyshuar si të implikuar në grushtin e shtetit.
