Hetuesit e sektorit të hetimeve rajonale në Ferizaj, kanë arrestuar një 39-vjeçar pasi që dyshohet se i njëjti me qëllim të mbulimit të humbjes së parave në biznes, kishte inskenuar rastin e vjedhjes së rëndë në shtëpinë e tij.
Policia ka njoftuar se i dyshuari me inicialet A.H., me datë 21.03.2019, kishte paraqitur në polici rastin e vjedhjes së rëndë në shtëpinë e tij duke deklaruar se nga persona të panjohur i ishin vjedhur 21.700 euro dhe 500 franga zvicerane, transmeton Klan Kosova.
“Hetimet e mëtejme kanë rezultuar me deklarimin në prani të avokatit mbrojtës, si dhe pranimin në tërësi të inskenimit të rastit nga vet ai me qëllim të arsyetimit para familjarëve për humbjen e parave në biznes”.
Me vendim të prokurorit të shtetit, i dyshuari është liruar dhe rasti shkon në procedurë të rregullt.
