Gjatë ditës së sotme, i pari i arsimit ferizajas, Afrim Llabjani ka vizituar Shkollën e Mesme Profesionale “Pjetër Bogdani” në Ferizaj, për të parë nga afër punimet që janë kryer në renovimin e kësaj shkolle, gjegjësisht ndërrimin e çatisë, renovimin e disa klasave dhe korridoreve si dhe rregullimin e oborrit të kësaj shkolle.
Masat për të mundësuar kushte të favorshme për zhvillimin e arsimit profesional nisin nga infrastruktura bazike, për të cilën Kryetari i Komunës, Agim Aliu pati dhënë premtimin se do të investoj në rregullimim dhe mirëmbajtjen e shkollave në territorin e Ferizajt.
I tillë është edhe ky projekt, për të cilën kanë përfunduar pothuajse të gjitha punimet, që kanë rezultuar me kushte më të mira në klasa, korridore dhe çatinë e re të godinës si dhe asfaltimin e pjesës para hyrjes së shkollës që ka qenë edhe kërkesë e udhëheqjes së këtij institucioni.
Drejtori Llabjani, ka vlerësuar punimet maksimalisht duke siguruar se ka mbështetjen e plotë të Kryetarit të Komunës, Agim Aliu për investime në objektet shkollore me theks të veçantë në ato profesionale për të nxitur edhe profesionistët e rinj të bëhen pjesë e kësaj shkolle.
Ky cikël investimesh në renovimin e objekteve shkollore po ndodh dhe ka përfunduar në disa shkolla, në përmbushje të kushtit bazik për arsim cilësor, kompletimit të infrastrukturës së objekteve shkollore.
