Një delegacion i komunës së Ferizajt, i kryesuar nga kryetari Muharrem Svarqa, gjatë qëndrimit në Bursa të Turqisë, u prit nga asociacioni i bizneseve RUMELISIAD, brenda të cilit shqiptarët zinin vend prijatar.
RUMELISIAD është një bashkësi e fuqishme e bizneseve, të cilën e përbëjnë 320 afaristë të suksesshëm që punësojnë rreth 50 mijë veta dhe me një eksport prej 1.5 miliard dollarësh.
Në takim kryetari Svarqa i njoftoi përfaqësuesit e kësaj bashkësie me mundësitë dhe përparësitë e investimeve në Ferizaj dhe në Kosovë.
Një numër afaristësh që kishin investuar në vendet përreth Kosovës, shfaqën interesim për investime.
Me këtë rast u bisedua për takime të përbashkëta në mes afaristëve të Bursës dhe atyre të Ferizajt, me qëllim të bashkëpunimit të bizneseve komplementare.
Pas këtij takimi, delegacioni i Ferizajt vizitoi disa biznese të fuqishme, të udhëhequra nga afaristë me prejardhje shqiptare, ku u bind me cilësinë e prodhimeve të tyre.
Gjatë vizitës në fabrikën INOKSAN, ferizajasit u njoftuan për rrjedhat e afarizmit dhe të prodhimit. Delegacioni i Ferizajt u ndal edhe në fabrikën e përpunimit të tekstilit Yedikardes, të pronarit Ali Yedikardes, gjithashtu me prejardhje ngas Kosova.
