Besa Luzha, Florina Duli dhe Rudinë Jakupi në emër të të gjithë qytetarëve kanë dorëzuar peticionin #DrejtësiPërAstritin tek Kryesia e Kuvendit të Republikës së Kosovës, si dhe Komisionit Parlamentar për të Drejtat e Njeriut, Barazi Gjinore, Persona të Pagjetur dhe Peticione, raporton lajmi.net
“Ne dorëzuam kërkesën tonë bashkë me nënshkrimet për peticione. Kemi dorëzua 23 mijë e 774. Kemi mbledh edhe ma shumë por kemi verifikuar disa dhe këta i kemi dorëzuar. Nëse këta qytetarë kanë kërkua që të zgjedhurit e popullit të diskutojnë për këtë rast mendoj se do të duhet të ndodhte një debat parlamentar. Kërkesa tjera të këtyre nënshkrimeve janë dorëheqja e ministres Hoxha dhe ministrit Hyseni po ashtu shkarkimi i personave përgjegjës të burgut dhe hetimi i pavarur ndërkombëtar”, ka deklaruar aktivistja Besa Luzha.
Ajo ka shtuar se presin që pas 2 dhjetorit të mbahet kjo seancë.
Zyrtarët e Kuvendit i kanë pranuar peticionet e dorëzuara, ndërkaq, ato pritet të dorëzohen edhe në Qeveri.
Astrit Dehari ka ndërruar jetë më 05 nëntor, kur po mbahej në burg si i dyshuar për sulmin ndaj Kuvendit të Kosovës./Lajmi.net
.
