Petrit Selimi që po ushtron detyrën e Ministrit të Punëve të Jashtme, ka bërë të ditur se kjo ministri ka marrë vendim të mos e lejojë liderin e Partisë Radikale Serbe, Vojisllav Sheshel, të vizitojë shtetin e Kosovës. Selimi i ka thënë KosovaPress-it se tashmë i mbetët organeve të rendit në Kosovë që të veprojnë kundër kalimeve ilegale të njerëzve, në rast se Sheshel tenton të futet në territorin e Republikës së Kosovës.
“Ministria e Punëve të Jashtme nuk e ka lejuar vizitën e tij, tash i takon organeve të rendit të veprojnë kundër kontrabandimit dhe kalimeve ilegale te njerëzve”, ka thënë Selimi përmes telefonit.
Nesër në orën 12:00 në veri të Mitrovicës pritet të mbahet një tubim partisë së Sheshelit, ndërkohë që pati raportime se politikani serb që akuzohej për krime lufte, Vojisllav Sheshel do të mund të vijë që të jetë pjesë e tubimit.
Ndërkohë, sipas Qeverisë, vizita e tij territorin e Kosovës do të sillte arrestimin e tij nga Policia e Kosovës./KosovaPress/.
