Një mësues fizkulture në gjimnazin e Manzës në Durrës është larguar nga puna pasi dyshohet se ishte përdorues lëndësh narkotike.
Lajmi u konfirmua nga drejtoresha e arsimit në Durrës, Lindita Muka, në një takim në prefekturën e Durrësit, me qëllim sensibilizimin e të rinjve për të denoncuar kultivimin e drogës.
“Pak ditë më parë shkarkuam nga detyra një mësues të gjimnazit të Manzës, pasi dyshonim se ishte përdorues i lëndëve narkotike. Mësuesi kishte krijuar probleme të ndryshme në gjimnaz. I ishte tërhequr vërejtje për çështje disiplinore disa herë. Në këto kushte, u mblodh këshilli disiplinor i shkollës, i cili bëri pezullimin e mësuesit. Më pas ai dha dorëheqjen, dhe Drejtoria Arsimore firmosi prishjen e kontratës me të”, tha Muka.
Burimet nga shkolla bëjnë të ditur se mësuesi i fizkulturës kishte marrë disa herë vërejtje për thyerje të disiplinës, madje kishte rënë në sy të nxënësve dhe stafit pedagogjik të shkollës si konsumues i kanabisit.
