Një donacion i madh i pajisjeve e inventarit shkollor, materialeve të ndryshme për nevojat e institucioneve shëndetësore si dhe pajisje të tjera, arritën në Ferizaj, donacion ky nga Gjermania e dhuruar përmes Shoqatës Humanitare “Ferizaj” për Komunën e Ferizajt.
Për ta falënderuar donatorin gjerman Georg Winkler dhe drejtuesen e shoqatës humanitare “Ferizaj”, Makfire Goca, mëngjesin e sotëm i priti në takim i pari i Ferizajt, Agim Aliu bashkë me drejtorin e DSHMS-së, Bekim Ademi dhe zyrtarin komunal, Agon Zhinipotoku.
Kryetari Aliu falënderoi donatorin dhe shoqatën që përmes këtij donacioni kanë qëllimin që të ndihmojnë e plotësojnë nevojat e shkollave si dhe institucioneve të kujdesit social e shëndetësor, donacion ky që po realizohet tash e sa kohë, në periudha të ndryshme nga donatori gjerman.
Falënderues për pritjen ishin edhe mysafirët që shprehën konsideratat më të larta e përgëzimin për organizimin dhe gjithë mbështetjen e Komunës përkitazi me këtë donacion.
