Kandidati i PDK-së për Kryetar të Komunës së Ferizajt, z. Agim Aliu, në takim me banorë të nëndegëve të qytetit, ka theksuar se njëri ndër problemet e shfaqura nga ana e banorëve për regjistrimin e të drejtave të tyre pronësore në regjistrin përkatës komunal, për pronarët e banesave të vjetra, do të marr zgjidhje në mandatin e tij qeverisës.
“Unë do të ngarkoj një person brenda Drejtorisë së Pronës, që do të merret ekskluzivisht vetëm me këtë problematikë të hasur në banesat e vjetra, të ndërtuara para luftës, ku ekziston e drejta e bashkëpronësisë.
Ne, në harmoni të plotë me ligjin përkatës, do të bëjmë zgjidhje që fati i banorëve me raste të tilla, të problemeve pronësore të mos mbetet peng i politikës, por që njëherë e mirë të zgjidhen problemet e tilla.
Siguria juridike për pronën dhe të drejtat tjera sendore janë të drejta themelore të njeriut, të cilat jam i vendosur t’i garantoj për qytetarët e Komunës së Ferizajt, gjithmonë sipas parashikimeve të ligjeve në fuqi, që rregullojnë këtë fushë” – theksoi kandidati Aliu.
