Drejtorët e arsimit nëpër komunat e Kosovës, mund të ballafaqohen me masa ndëshkuese për mosrespektim të vendimit të Ministrisë së Arsimit për kompensim të orëve të humbura.
Këtë e kanë thënë zyrtarë të Ministrisë së Arsimit, të cilët edhe kanë treguar se në fund do të marrin raport nga drejtoritë komunale dhe nga Inspeksioni i arsimit për procesin mësimor, raporton KTV.
Sindikata e Bashkuar e Arsimit ka mbajtur të hënën mbledhje me kryetarë të niveleve komunale, ku ka përsëritur se nuk do të zbatohet vendimi i Ministrisë.
Në këtë mbledhje, kryetarët e sindikatës në nivel komunal, kanë treguar se pavarësisht presioneve që kanë pasur, shumica e shkollave në Kosovë nga e hëna kanë filluar pushimin pranveror.
Diskutim u bë edhe për seancën e jashtëzakonshme të Kuvendit të Kosovës, si dhe për gjuhën e përdorur të deputetëve.
Disa përfaqësues të komunave kërkuan të mbahet protestë 1 orësh për gjuhën fyese, që sipas tyre, kanë përdorur deputetët në këtë seancë, por në fund u vendos që të ketë vetëm reagim të shkruar.
